Ferill 875. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1311 — 875. mál.
Tillaga til þingsályktunar
um lögfestingu og framfylgd mengunarbótareglu.
Flm.: Rafn Helgason, Guðbrandur Einarsson, Hanna Katrín Friðriksson, Jón Steindór Valdimarsson, Sigmar Guðmundsson.
Alþingi ályktar að fela umhverfis-, orku- og loftslagsráðherra, heilbrigðisráðherra og fjármála- og efnahagsráðherra að skipa starfshóp til að stuðla að víðtækari lögfestingu og framfylgd mengunarbótareglu í íslenskum lögum og reglugerðum.
Markmið starfshópsins verði:
a. að kortleggja og greina samfélagslegan kostnað og önnur neikvæð úthrif af losun gróðurhúsalofttegunda og loftmengunarefna með sérstakri áherslu á áhrif þeirra á heilsu fólks, vistkerfaþjónustu og loftslagsskuldbindingar Íslands,
b. að leggja til nauðsynlegar breytingar á opinberum gjöldum og eftir tilvikum á lögum til að samfélagslegur kostnaður af völdum mengunar sé bættur að fullu, óháð því um hvaða atvinnugrein ræðir.
Starfshópurinn verði skipaður fulltrúum Umhverfisstofnunar, embættis landlæknis, Háskóla Íslands, fjármála- og efnahagsráðuneytis, heilbrigðisráðuneytis og umhverfis-, orku- og loftslagsráðuneytis, auk þess sem leitað verði álits Félags lækna gegn umhverfisvá. Starfshópurinn skili ráðherrum niðurstöðum sínum eigi síðar en 1. júní 2025. Ráðherrar leggi fram frumvörp á grundvelli þeirra fyrir lok árs 2025.
Greinargerð.
Mengunarbótareglan fyrirfinnst víða í íslenskri löggjöf, til að mynda í innheimtu kolefnisgjalds og gjalds fyrir meðhöndlun úrgangs. Enn eru þó stunduð umfangsmikil viðskipti í íslensku hagkerfi sem stuðla að bæði mengun og sóun en engin mengunarbótaregla gildir um. Má nefna að tilskipun Evrópuþingsins og ráðsins (ESB) 2016/2284, sem kveður á um hámark losunar loftmengunarefna, hefur ekki verið innleidd.
Með þingsályktunartillögu þessari er lagt til að umhverfis-, orku- og loftslagsráðherra, heilbrigðisráðherra og fjármála- og efnahagsráðherra verði falið að skipa starfshóp sem kortleggi og greini samfélagslegan kostnað af mengun í íslensku hagkerfi og leggi til breytingar á gjaldtöku, og eftir tilvikum breytingar á lögum, til að tryggja að þeir aðilar sem mengi bæti samfélagslegan kostnað sem er á ábyrgð þeirra.